Бунтовниците презедоа контрола над половина од Алепо, вториот по големина град во Сирија, без да наидат на никаков отпор, соопшти денеска Сириската опсерваторија за човекови права со седиште во Велика Британија, јавува Би-Би-Си.

Опсерваторијата соопшти дека 277 луѓе, вклучително и повеќе од 20 цивили, биле убиени од почетокот на офанзивата во средата.

Офанзивата е најголемата воена акција против сириската влада во последниве години и првпат бунтовниците се борат против силите на претседателот Башар ал Асад во самиот Алепо откако сириската армија со помош на Русија и Иран ги протера во голема офанзива во 2016 година.

Аеродромот во Алепо и сите патишта кои водат до градот се затворени, изјавија воени извори за Ројтерс.

На видеото објавено на социјалните мрежи се гледаат бунтовнички борци внатре во градот. Би-Би-Си ја лоцираше снимката во западните предградија на Алепо. На видеата се гледаат и вооружени мажи на околу седум километри од средновековната цитадела Алепо, која се наоѓа во строгиот центар на градот.

Претходно во петокот, владините сили соопштија дека ги вратиле позициите во неколку градови во провинциите Алепо и Идлиб, по офанзивата што ја започна исламистичката бунтовничка група Хајат Тахрир ал-Шам (ХТС) во средата.

Заменикот на хуманитарниот координатор на ОН за Сирија, Дејвид Карден, рече дека е длабоко вознемирен од влијанието на ескалацијата на непријателствата врз цивилите.

Сириските и руските авиони во петокот извршија 23 воздушни напади во близина на Идлиб, при што загинаа четворица цивили, а беа ранети 19, според руските новински агенции, нејзината војска ги бомбардирала „екстремистичките сили“.

Портпаролот на Кремљ Дмитриј Песков изрази поддршка за „владата на Сирија брзо да го врати редот“ и рече дека суверенитетот на земјата е нападнат.

Голем број вооружени групи спротивставени на владата на Асад – вклучително и џихадисти – се борат против сириската влада.

Идлиб, последното преостанато упориште на опозициските сили, е главно контролирано од ХТС, но исто така е домаќин на бунтовничките фракции поддржани од Турција.

Борбите во Идлиб во голема мера престанаа во 2020 година, кога Турција и Русија, клучниот сојузник на Сирија, посредуваа за прекин на огнот за да го спречат притисокот на владата да ја врати провинцијата.

Но, во средата, ХТС и нејзините сојузници соопштија дека ја започнале офанзивата за „да ја одвратат агресијата“, обвинувајќи ја владата и сојузничките милиции за ескалација на непријателствата.

Граѓанската војна во Сирија започна во март 2011 година, а се проценува дека повеќе од половина милион луѓе, главно цивили, загинале во бруталните борби, додека речиси половина од населението е раселено.