Повеќе од 130.000 луѓе поднесоа колективна тужба против Booking.com, за кој веруваат дека вештачки ги зголемил цените на сместувањето, објави денес Холандското здружение на потрошувачи. Вкупната штета, според нивните тврдења, би можела да изнесува стотици милиони евра, со потенцијална компензација од неколку десетици или дури стотици евра по корисник.

Тужбата ги вклучува сите граѓани на Холандија кои резервирале сместување преку Букинг од 1 јануари 2013 година. Организациите тврдат дека дури и оние кои направиле резервации директно со хотелот или преку други канали би можеле да бидат погодени од повисоките цени поради влијанието што Букинг го имаше врз пазарот.

– Судскиот процес може да трае со години, но прво сакаме да разговараме со Booking за можностите за договор – рече портпаролот на Здружението на потрошувачи.

Компанијата Booking ги отфрли обвинувањата и изјави дека „секогаш се обидувала да им понуди најдобри можни цени и транспарентно искуство со резервација на корисниците“.