Зачестени се заедничките инспекции на Министерството за туризам, Комисијата за заштита на потрошувачите и Министерството за внатрешни работи на лица кои нелегално ја вршат професијата „туристички водич“ и на брегот на Црното Море и во внатрешноста на државата, објави „Сега.бг.њус“.

На 8 август беа проверени шест лица кои воделе туристички групи во Несебар и Созопол. За еден од нив е констатирано дека не е регистриран како законски надлежен туристички водич во Националниот туристички регистар, а немал и легитимација. На 15 август извршени се проверки на две лица кои водат групи туристи во Балчик. Проверките на контролните органи ќе продолжат во текот на целата туристичка сезона, соопшти Министерството за туризам.

Оттаму потсетуваат дека контролата била зголемена на инсистирање на здруженијата на туристички водичи. Целта е да се спречат нефер комерцијални практики и да се обезбедат квалитетни професионални услуги на туристички водич, оптимална заштита на интересите на корисниците на туристичките услуги и добра слика за професијата туристички водич. Според податоците на Министерството за туризам, 456 квалификувани туристички водичи се регистрирани во Националниот туристички регистар по успешно положени испити за стекнување деловна способност и има 1195 законски регистрирани лица.