Заклучно со ноември оваа година должниците под 20 години во Бугарија се 4.000, а оние под 25 – 36.000, должници од 25 до 30 години се 80.000. Така, должниците под 30 години се 120.000 т.е. лицата против кои се водат извршни постапки во вредност нешто повеќе од 1 милион лева, објави „Сега.бг.њус“. Истражувањата покажуваат дека потрошувачите до 30 години земаат кредити за да заминат во странство или да купат модерни апарати и облека. Не се малку такви кои целата плата ја трошат во ноќни клубови и казина.

Затоа мора да земат кредит за да ги пополнат дупките во нивниот буџет до следната плата, објаснуваат од комората. Додаваат дека непромислените набавки и честото задолжување на пари се показател за немање финансиска култура и писменост при потпишување кредитни договори и неправилна распределба на приходите и расходите. Извршителите забележуваат дека постои постојана тенденција за зголемување на уделот на оние кои прибегнуваат кон заеми, брзи и потрошувачки кредити.

Станува збор за луѓе кои се на почетокот на својата работна кариера, некои од нив и студенти. Имаат потешкотии во плаќањето на месечните придонеси затоа што самите работат сезонски или доколку се на постојано работно место, главно во услужниот сектор, се слабо платени. Во обид да ги научи младите како да не влегуваат во вакви должнички спирали, Комората на приватните извршители започнува национална кампања „Лични финансии и управување со кредити – основни правила и информирани одлуки“ наменета за учениците од 11 и 12 одделение (17-19- годишници). Извршителите ќе им држат предавања на младите за управување со лични финансии, управување со приходи и расходи, планирање на кредити и основни знаења.