Поранешниот бугарски премиер и пратеник, Кирил Петков, денеска официјално поднесе оставка од функцијата копретседател на партијата Продолжуваме со промената. Во својата објава на Фејсбук, тој нагласи дека ја прифаќа одговорноста за корупциските афери поврзани со партиските кадри и најави дека нема да се кандидира за нови лидерски позиции при претстојното Генерално собрание на партијата во септември, јавуваат бугарските медиуми.

Петков исто така објасни дека ќе остане активен член на партијата и дека ќе продолжи да се среќава со граѓаните „не како лидер, туку како еден од нив“. Оставката следи по минатонеделното најавување за повлекување од функцијата пратеник.