„Бритиш ервејс“ објави дека ќе престане да лета за Пекинг од 26 октомври оваа година до ноември 2025 година, што сигнализира притисок да се натпреварува со кинеските авиопревозници поради забраната за летови над Русија. Британскиот авиопревозник нагласи дека ќе продолжи да лета секојдневно до Шангај и Хонгконг, но не соопшти дали ќе воведе нова рута која ќе ја замени онаа до кинеската престолнина.

На европските и британските превозници не им е дозволено да летаат низ рускиот воздушен простор, што значи дека нивните летови до Азија траат неколку часа подолго, што ги прави поскапи и помалку привлечни за патниците, информира Хина.

Британската авиокомпанија ја обнови линијата до Пекинг пред нешто повеќе од една година, како дел од нормализацијата на патувањето по пандемијата на ковид-19. По укинувањето на ограничувањата за пандемијата, сообраќајот меѓу Кина и Европа закрепна многу бавно и во моментов многу летови на таа рута доминираат од кинески авиопревозници.

Во такво опкружување, превозникот „Вирџин Атлантик“ веќе извести дека од октомври повеќе нема да лета за Шангај. Превозниците како „Луфтханза“ истакнуваат дека заработуваат помалку пари и губат во мечот со кинеската конкуренција, на која ѝ е дозволено да лета низ рускиот воздушен простор.