Повисоките цени на говедското месо и свежите производи доведоа до годишен пораст на инфлацијата на храната во Велика Британија. Шефот на синџир ресторани за стек изјави за Би-би-си дека цената на месото скокнала за една петтина. Цените на храната се зголемија за 2,8% до мај, што е најголем годишен пораст од мај 2024 година, кога инфлацијата на храната изнесуваше 3,2%, според Британскиот конзорциум за малопродажба. Земјоделските експерти изјавија дека цените на говедското месо, се зголемиле поради големата побарувачка и ниската понуда предизвикана од недостаток на владина поддршка. Томас Мауние, коосновач на синџирот ресторани за стек Фазенда, рече дека месната индустрија се соочува со „тешки времиња“. Мауние, чиј синџир инспириран од Бразил има осум ресторани во Велика Британија, рече дека неговата компанија префрлила околу 2% од зголемените оперативни трошоци на клиентите.

„Цените на говедското месо се зголемија за околу 20% во последните 12 месеци. Голем дел од тоа се случи во последните шест месеци, но компаниите не можат да го пренесат сето тоа на своите клиенти“, додаде тој.

Мауние рече дека зголемените трошоци за производство и зголемувањето на националната минимална плата, исто така, придонесуваат за повисоки вкупни трошоци, кои би можеле да се пренесат на потрошувачите. Ник Ален, извршен директор на Британската асоцијација на преработувачи на месо, рече дека конкуренцијата меѓу супермаркетите досега ги држела цените на говедското месо ниски, па затоа е само прашање на време кога клиентите ќе бидат погодени од зголемувањето на трошоците, пренесува БГНЕС.