Холивудскиот актер Брендан Фрејзер глуми во новиот филм на режисерот Дарен Аронофски насловен „The Whale“, а за потребите на улогата се трансформираше во човек тежок 270 килограми.

Во претстојниот филм, Фрејзер глуми човек кој се бори со дебелината и се обидува повторно да се поврзе со својата 17-годишна ќерка. Првиот поглед на филмот пристигна откако беше потврдено дека светската премиера ќе ја има на годинешниот филмски фестивал во Венеција. На славниот актер во филмот ќе му се придружи актерската екипа која ја вклучува омилената Сејди Синк од популарната серија „Stranger Things“ како и Хонг Чау, Саманта Мортон и Тај Симпкинс.

Premiering at the 79th Venice Film Festival ??
• Darren Aronofsky’s THE WHALE starring Brendan Fraser and Sadie Sink
• Joanna Hogg’s THE ETERNAL DAUGHTER starring Tilda Swinton
• Ti West’s PEARL starring Mia Goth pic.twitter.com/AxlAbhWDRo

— A24 (@A24) July 26, 2022

„Ќе биде нешто што никогаш не сте го виделе досега. Тоа е навистина сè што можам да ви кажам. Гардеробата и костимот беа беспрекорни, масивни. Ова секако е многу различно од сè на што сум работел до сега, но да не бидам срамежлив, знам дека ќе остави траен впечаток“, изјави актерот за „Unilad“ минатата година зборувајќи за својата улога во филмот.

Поранешниот миленик на публиката е најпопуларен по улогата во филмот „The Mummy“, но и за многу други како „Airheads“, „Blast from the Past“, „George of the Junge“ и „Gods and Monsters“. Актерот имаше споредна улога во филмот „No Sudden Movie“ на Стивен Содерберг минатата година, но филмот „The Whale“ дефинитивно е неговото големо враќање бидејќи ја означува неговата прва главна улога по акциониот филм „Breakout“ од 2013 година.