Жозеп Борел утрово пристигна во Киев, каде што ќе се обиде да ги увери украинските власти дека продолжува поддршката од ЕУ за Украина, јавуваат агенциите.

Високиот претставник на Европската унија за надворешна политика и безбедност е првиот европски функционер кој доаѓа во Киев по победата на Доналд Трамп на претседателските избори во САД. Новиот американски претседател во предизборната кампања навести дека би можеп да ја запре поддршката на Вашингтон за Киев во борбата против руската инвазија.

„Ние од почетокот ја поддржуваме Украина, а од мојата последна посета ја пренесувам истата порака – ќе ве поддржиме колку што можеме“, изјави Борел.

-Никој не знае како точно ќе се однесува новата американска администрација, додаде тој, потсетувајќи дека претседателот во заминување Џозеф Бајден има уште два месеци да донесе одлуки. Според некои проценки, Европската унија од почетокот на руската инвазија врз Украина потрошила околу 125 милијарди долари за поддршка на нападнатата земја, додека помошта од САД е над 90 милијарди долари.