Поранешниот висок претставник на ЕУ за надворешна политика и безбедност, Жозеп Борел, денеска ги охрабри Франција и Германија да ја водат изградбата на европската одбрана надвор од ЕУ. Со оглед на неможноста за тоа да се постигне единствен консензус во рамките на Унијата, објавија шпанските медиуми.

„Мојот совет е да престанете да барате решение таму каде што нема. Ако има група европски земји кои сакаат да градат европска одбранбена унија, тогаш нека го направат тоа преку нов меѓувладин договор, како што направивме за да го спасиме еврото“, рече Борел во говорот на собирот во Барселона, пренесе Ефе.

Тој потсети дека во случајот со еврото беше дизајниран договор кој не беше дел од Унијата со цел да се создадат механизми за да се спречи колапсот на еврото.

Борел, кој сега претседава со Истражувачкиот центар за меѓународни односи во Барселона, ги повика Франција и Германија да почнат да работат на создавање европска одбрана, нагласувајќи дека одбранбената сфера е исклучива одговорност на поединечни држави.

„ЕУ потоа може да обезбеди заеми, но командата и контролата на одбраната е работа на војската“, посочи Борел.

Тој ги повика и европските земји координирано да инвестираат во воените капацитети, за да не се трошат пари и да се создадат интероперативни сили.