Скроени се измени на Законот за плати за избрани и именувани лица, и со намалувањето на платите треба да се ослободат средства за најранливите категории, најави вицепремиерот задолжен за економски прашања, Фатмир Битиќи во гостување во ТВ 24.

-Минатата недела Владата донесе одлука и задолжи работна група од четири министри за нови антикризни мерки. Утре на Влада ќе доставиме и измени на Законот за плати на избрани и именувани лица, за поправедено решение, со кое ќе ослободиме дел од средствата за антикризни мерки за најранливите катерогии, бидејќи тоа е клучно во временски периоди кога сите треба да покажеме солидарност – изјави во понеделникот Битиќи.

Законските измени потоа треба да одат во Собранието и да се гласаат од страна на пратениците кои исто така се опфатени со категоријата „избрани и именувани лица“. Битиќи вели дека секој ќе си гласа по сопствено убевување, но дека пратеничката група на СДСМ е сложна дека се потребни ваквите законски измени.

Од април годинава, 1.060 избрани и именувани функционери добија повисоки плати за 78 проценти.Платите на функционерите се зголемија по одлуката на Уставен суд. За повисоки плати на функционерите до крајот на годината се испланираа дополнителни 960 милиони денари, што беше една од причините за буцетска прераспределба на ставките.

Битиќи нагласи и дека со истата таа пренамена на буџетот има нов пакет на антикризни мерки од околу 70 милиони евра кои ќе бидат наменети за најранливите категории на граѓани.

-Остануваат денови до обзнанување на новиот пакет мерки – рече Битиќи, и нагласи дека оваа Влада предводена од СДСМ поинаку ги сфаќа ранливите категории и креира мерки таргетирани за нив.