Мрежите на Хезболах се тешко оштетени, неговите борци се осакатени, неговото раководство е убиено, а неговата воена инфраструктура е под постојано бомбардирање. Хезболах се соочува со најголемата криза во последните четири децении, пишува Би-Би-Си во анализа на ситуацијата во Либан.

Израелскиот министер за одбрана Јоав Галант вели дека кампањата на Израел да го нападне Хезболах сега „се продлабочува“. Но, тоа е стратегија со висок ризик, во која не смее да се занемари капацитетот на Хезболах за насилен одговор.

Сирените за тревога продолжуваат да се огласуваат низ Израел, а министерот за одбрана Галант им порача на Израелците „да покажат смиреност, дисциплина и целосна послушност кон директивите на Високата команда“.

Израелските воени претставници велат дека, за разлика од Газа, предупредувањата не значат дека армијата е подготвена да изврши копнена инвазија на јужен Либан.

-Во моментов сме фокусирани само на воздушната кампања, изјави денеска висок функционер.

Засега се чини дека Израел ќе види што може да постигне од воздух. Поранешниот командант изјави за израелската телевизија Канал 12 дека досега воздухопловните сили покажале само мал дел од своите способности.

-Но, Израел не може да направи сè што сака од воздух, дури и ако, како што изгледа возможно, авионите ќе опустошат цели села. Копнената инвазија во одреден момент – колку и да е ограничена – изгледа неизбежна, заклучува Би-Би-Си.