Извршниот директор на компанијата за луксузни стоки ЛВМ Aш и најбогатиот Французин, Бернар Арно, остро го критикуваше предлогот за воведување данок од два проценти на богатство над 100 милиони евра, опишувајќи го како „напад врз француската економија“, објави британскиот весник „Сандеј тајмс“, цитиран од Ројтерс.

„Ова очигледно не е техничка или економска дебата, туку отворено искажана желба за уништување на француската економија“, рече Арно во интервјуто, критикувајќи го иницијаторот на предлогот, францускиот економист Габриел Зукман.

Зукман, рече тој, е „пред сè радикален левичарски активист“ кој користи „псевдоакадемска експертиза“ за да промовира идеологија насочена кон уништување на либералниот економски систем. Арно го опиша овој систем како „единствениот што работи за доброто на сите“. Предлогот за данок на богатство добива политичка сила во Франција, а левичарските партии вршат притисок тој да биде вклучен во буџетот за 2026 година.

Предлог-законот би се однесувал на личен имот во вредност од над 100 милиони евра. Премиерот Себастијан Ле Корнеј е под зголемен притисок од Социјалистичката партија да го вклучи предлогот во претстојниот буџет. Левичарските политички лидери веќе предупредија дека би можеле да донесат гласање за недоверба ако мерката се игнорира. Според анкетата на Францускиот институт за истражување на јавното мислење (Ифоп), нарачана од Социјалистичката партија, 86 проценти од француските граѓани ја поддржуваат идејата за воведување таков данок, пренесува БТА.