Завчера Владата донела Одлука за престанување на важење на претходната одлука за спојување на двете концесии за експлоатација на бакар и злато во рудникот Иловица во општините Босилово и Ново Село, информираше на прес-конференција министерот за економија Крешник Бектеши. Тој рече дека апстинирал во гласањето за ваквата одлука, затоа што според Законот за минерални суровини, концесионерот има право да ги спои концесиите, а во спротивно, арбитражниот суд може да пресуди во негова корист и тоа да нѐ чини милионски износ. Бектеши практично ги повтори сите аргументи што ги кажа на брифингот со новинарите откако слета од Вашингтон, но овој пат многу поексплицитно порача дека откако ќе се спојат концесиите и постапката ќе се врати од почеток затоа што во меѓувреме има нова регулатива: „Ќе најдеме правен простор за оваа инвестиција да не се случи“.

– Да бидам прецизен. Барањето за спојување не е одбиено, туку само е укината одлуката за спојување што на 28 јуни ја донесе Владата. Владата мора да се произнесе дали го одбива или го прифаќа барањето. Со тоа што ја укина одлуката за спојување, не значи дека престанаа концесиите. „Еуромакс“ и понатаму ги има двете концесии и повторно ќе бара спојување врз основа на член 61 од Законот за минерални суровини, кој вели дека право на концесионер е ако има соседни концесии да ги спои. Министерството за економија по службена должност имаше комисија што излезе на терен. Потврдено е дека концесионерот, со ист назив и со исти сопственици, ги исполнува условите за спојување – рече Бектеши и ја презентираше картата на која може да се види дека во границите на втората концесија, всушност е влезена првата.

– Зошто е распишан јавен оглас за втора концесија и зошто има вакви координати, треба да одговараат тие што направиле теренски увиди, како и институции надлежни за катастарски парцели – вели Бектеши.

 Министерството за економија останува на ставот за спојување концесии

Тој вели дека сите во Министерството за економија остануваат на ставот дека треба да се спојат концесиите, потоа да се вратиме на почеток затоа што „Еуромакс ресорсис“ мора да достави документи во согласност со новата регулатива што се случила во меѓувреме откако биле дадени концесиите.

– Во меѓувреме се смени регулативата и не смее да се експлоатираат рудите со цијанид. Министерството за економија мисли дека најдобра опција е да се донесе акт каде што се утврдува дека одредена потенцијална инвестиција е спротивна на стандардите на животна средина. Откако ќе се донесе тој акт, утредента Министерството за економија ќе донесе предлог за раскинување на договорот. Но, да не се постапи во согласност со Законот за минерални суровини, тоа е голем ризик за арбитража – вели Бектеши.

Тој уште еднаш ги повтори сите процедури што се случувале од 2005 година досега за двете концесии, а на новинарите им ги подели сите документи и сите одлуки, потенцирајќи дека секогаш имало позитивни мислења од тогашните надлежни во институциите, вклучувајќи ги и оние на тогашните градоначалници на Босилово и на Ново Село. Одлуката за експлоатација за првата концесија е потпишана од Владо Бучковски, а Одлуката за доделување на втората концесија ја потпишал Никола Груевски.

 Никого не ставивме во заблуда

– Министерството за економија никого не измамило ниту ставила во заблуда, доставивме хронологија од 2005 година до сега, со образложение за спојување на двете концесии за експлоатација на минерални суровини. Во Владата имавме конструктивна расправа и долга дебата. Некои претставници од Владата рекоа дека нивните ставови погрешно биле пренесени во некои медиуми, но тоа оставам на нив да си го кажат – рече Бектеши откако по седницата на 28 јуни, во јавноста беше пренесена веста дека Владата била доведена во заблуда дека Управниот суд донел одлука за спојување на концесиите, па затоа го потпишале спојувањето.

Инаку, со одлуката на Уставен суд фактички се врати првата концесија што „Еуромакс“ ја доби, откако компанијата се жалеше по одлуката на Владата за раскинувањето на договорот.

– Договорот беше раскинат затоа што „Еуромакс“ ги немаше доставено сите документи. За вториот локалитет има Одлука за давање концесија, но нема дозвола за експлоатација на рудата, што е финален документ. Всушност, веќе е истечен рокот во кој „Еуромакс“ требаше да почне со експлоатација и Министерството за економија може и ќе почне постапка за одземање на втората концесија по овој основ. Но, дали ќе се реши проблемот? Не сум сигурен со оглед на случувањата со првата концесија – вели Бектеши.

Не бранам приватни интереси

Бектеши ги демантираше сите шпекулации и обвинувања од опозицијата дека брани интереси на приватни фирми, туку напротив, потенцираше дека ги штити интересите на граѓаните.

– Какви работи се прават на берза, кој влегува во сопственоста на „Еуромакс“, тоа не го знам и не е работа на Министерството за економија. Но, знам дека „Еуромакс“ е најголем трговец на минерални суровини на светските берзи и дека удели во компанијата има и ЕБОР – рече Бектеши.

По завршувањето на пресот на Бектеши, портпаролката на ВМРО-ДПМНЕ Марија Митева одржа прес на кој праша: Зошто, ако навистина сакале да нема рудник во Иловица, дозволиле фирма на семејството Дестани кое важи за блиско до ДУИ да влезе во сопственичката структура на „Еуромакс ресорсис“, и тоа во време кога се води спор по еднострано раскинат договор од страна на владата, со купување на 25 проценти од акциите.

Бектеши, пак, на пресот доби новинарско прашање зошто ја одржува прес-конференцијата сам, без поддршка на премиерот или на некои од министрите, кои отворено зборуваа дека се против рудникот, но тој не даде прецизен одговор.