Со постапката што се одвиваше за пожарот во модуларната болница во Тетово, жртвите изгореа по вторпат, а виновниците беа наградени, рече денеска на прес-конференција екс-министерот за здравство Беким Сали кој беше на таа функција од јануари 2022 година до февруари 2023 година.

Сали тврди дека се посомневал оти пожарот во модуларната болница е предизвикан поради злоупотреба на градежната постапка и постапката за јавна набавка, па затоа побарал внатрешна ревизија од секторот за ревизија на Министерството за здравство.

Таа внатрешна ревизија беше презентирана во документарецот на ИРЛ, ама Беким Сали не ја имаше јавно покажано во времето кога била готова и кога тој бил на функција министер, туку таа за првпат беше обелоденета дури во документарецот, шест месеци подоцна. Ниту министерот Беким Сали, ниту министерот Фатмир Меџити не сакале да го достават овој ревизорски извештај до новинарите на ИРЛ.

Според Сали препораката била Министерството за здравство да го раскине договорот за модуларните амбуланти во Скопје со „Брако“ и да не му исплати ништо.

-Во јануари 2023 година нивниот извештај беше готов и добивме препорака Министерството за здравство да го раскине договорот за извршување на работите и да не му исплати ништо на извршителот „Брако“ до крајот на судскиот процес. Но на 23 февруари 2023 година бев разрешен од функцијата министер за здравство и како што видовме во емисијата, мојот наследник Фатмир Меџити и покрај препораките на внатрешната ревизија на МЗ, во јули 2023 преку владата му го исплатил долгот на „Брако“. Еден од главните посочени виновници во емисијата всушност е награден, рече Сали.

Наспроти ова тврдење на Сали, Министерството за здравство, односно министерот Фатмир Меџити синоќа преку соопштение пак, демантираше дека Министерството за здравство му исплатило на „Брако“ пари за модуларните амбуланти во Скопје.

„Министерството за здравство ги демантира и ги отфрла како невистина наводите дека од негова страна биле исплатени пари за модуларните објекти на Здравствен дом Скопје. Ова е апсолутна невистина“, рекоа синоќа од Министерството за здравство.

Беким Сали пак, праша чија иницијатива била да се амнестира „Брако“.

-Дали ова било барање на Ковачевски, добра можност на министерот за здравство Фатмир Меџити или наредба на Артан Груби? Фатмир, дали и за овој неуспех е виновно минатото раководство на Министерството за здравство и поранешниот министер? Која е обврската на оваа власт кон Кочо Анѓушев? Зошто власта си дозволува да гази врз жртвите од пожарот на 8 септември, само за корист од неколку милиони евра? Што друго да се случи за Ковачевски и Фатмир Меџити да се извинат за сите овие штети и да си поднесат оставки?, праша Сали.

Тој праша каква е одговорноста на главниот обвинител Љубомир Јовески кој поднел тужба за споредна одговорност игнорирајќи ја основната одговорност на фирмата изведувач, на нарачателите. Додаде дека амбулантите во Скопје првично биле изработени од истите материјали како тетовската модуларна болница што изгоре.