Јавното претпријатие за државни патишта на 26 јули објавило јавен оглас за вработување работници во Проектна единица за спроведување на проектот за изградба на инфраструктурниот Коридор 8 (делница Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10Д (делница на автопатот Прилеп – Битола) на определено време. Вработувањата се до завршување на Проектот, односно до 22 јануари 2028 година. Меѓу другите, се бараат двајца специјалисти за експропријација, и тоа за почетна плата од 45.045 денари. Работното време е во една смена од 8 часа дневно, а неделното работно време изнесува 40 часа од понеделник до петок. Се бара и еден известувач за проектот за почетна плата од 45.045 денари за истото работно време. Огласена е и една позиција за администратор, а неговата почетна плата ќе биде 29.866 денари, а за толкава плата ќе биде ангажиран и еден возач, кој исто така се бара на јавниот оглас.

ЈПДП бара и пет специјалисти за инвестиции и градба на патишта чија основа плата ќе изнесува 55.037 денари, а истата плата е посочена и за специјалистите за урбанистичко планска документација, за подготовка, изработка и следење на проектна документација, за геодетски работи, за заштита на животната средина, за електроенергетски објекти и за сообраќајна сигнализација, вкупно 9 на број. За овие работни места ќе важи истото работно време од 8 часа од понеделник до петок. Изборот на кандидатите ќе се изврши во рок од 45, 90 или 120 дена по истекот на рокот за пријавување, во зависност од бројот на пристигнатите пријави, стои во објавата.

Инаку, досега на контото на американско-турскиот конзорциум што треба да ги гради автопатските делници од коридорите 8 и 10Д, легнаа околу 175 милиони евра, од вкупно 250-те милиони евра кои се обврска на државата за оваа година. Во изминатите пет месеци откако на патарината меѓу Тетово и Гостивар беше најавен стартот на градежните работи, на терен нема машини ниту работници, а префрлените средства се наводно за почетни градежни работи.

Од ЈПДП неколкупати повторија дека исплатите се во согласност со Договорот за изградба на коридорите 8 и 10Д, односно за мобилизација, набавка на опрема, бази и материјали за изведувачот и за поддршка на пристап до средства, за геомеханички испитувања, мобилизација, екипирање со механизација, воспоставување кампови, лабораторија и други работи од страна на изведувачот.

Според најавите до 2027 година треба да се изградат 110 километри автопат, а тоа ќе чини најмалку 1,3 милијарди евра. Околу 300 милиони ќе бидат потребни и за експропријација на земјиште низ кое ќе поминуваат автопатиштата.