Барселона одби 250 милиони евра за своите суперталенти
Долговите на Барселона од ден во ден се зголемуваат, но каталонскиот тим не се откажува од своите суперталентирани фудбалери.
Според годишниот финансиски извештај, долговите на Барселона изнесуваат 1.17 милијарди евра, но ниту таквата финансиска состојба не ја натера управата на распродажба на фудбалерите, посебно на младите кои треба да бидат идните ѕвезди по заминувањето на Лионел Меси.
Според весникот „Мундо Депортиво“, Барселона во изминатиот период одбила три понуди за своите суперталенти кои можеа да и донесат 250 милиони евра со кои ќе покриеше дел од долговите. Станува збор за Ансу Фати, Педри и Тринкао.
Препорачано
Ансу Фати минатата сезона дебитираше за првиот тим на Барселона и уште како 17-годишно момче покажа дека тој може да биде наследникиот на Лионел Меси и идна голема суперѕвезда на Барселона по заминувањето на Аргентинецот. Досега забележа 33 настапи за првиот тим на Барселона и постигна осум голови, а оваа сезона на десет натпревари даде пет гола и има четири асистенции, но повредата на коленото го оддалечи од терените. Манчестер јунајтед изминатото лето за него понуди 150 милиони евра, но поранешниот претседател на Барселона, Хосеп Марија Бартомеу, без размислување ја одби.
Педри исто така има 18. години, а на „Камп Ноу“ пристигна во 2019 година од Лас Палмас за 10 милиони евра. Младиот фудбалер веднаш се наметна како важен дел од тимот на Роналд Куман и по неговото доаѓање веќе одигра 34 натпревари за првиот тим во кои постигна три гола и имаше четири асистенции.
Според „Мундо Депортиво“, Баерн Минхен понудил 40 милиони евра, но европскиот шампион експресно бил одбиен, а Барселона воопшто не сакала да седне и да преговара за продажба на младиот Педри.
Последното име кое е магнет за останатите екипи е Тринкао кој во последниот летен преоден рок за сума од 31. милион евра пристигна од Брага, а можеше да си замине за двојно повеќе и тоа без да одигра ниту една минута за првиот тим на каталонците.
Неговиот агент Жорге Мендеш ги известил челниците на Барселона дека има понуда тешка 60 милиони евра за Тринкао, но таа била одбиена. Се шпекулира дека понудата е од Манчестер јунајтед.
Тринкао сезонава одигра 30 натпревари, најчесто влегувајќи од клупата и досега постигна три гола, но тренерот Роналд Куман верува во неговите квалитети.
Според весникот, Барселона планира токму тројцата млади фудбалери да бидат идните ѕвезди на клубот по заминувањето на Лионел Меси кои можно е да се случи на лето.
