Барселона е во потрага по засилување во кошаркарскиот тим, а најновата мета е Американецот Мајлс Норис, 25-годишно крило кое неодамна доби отказ од Бостон Селтикс.

Норис е играч кој главно настапуваше во развојната НБА лига. Минатата сезона одигра само три натпревари за Бостон, но во Џи-лигата имаше далеку подобри бројки. Во дресот на Мемфис Хасл бележеше 17,1 поени, 5,5 скокови и 38% успешност во шутот за три поени. Подоцна, во тимот на Мејн Селтикс, неговите просеци беа 14,5 поени, 6,2 скока и 39% за тројки.

Ова не би било негово прво европско искуство – во 2023 година накратко настапуваше за турскиот Бодрумспор, но одигра само четири средби без посериозно влијание.

Барселона верува дека со својата шутерска способност од далечина и атлетика, Норис би можел да се вклопи во европскиот стил и да донесе дополнителна длабочина во ростерот.

Останува да се види дали преговорите ќе завршат со потпис, или Американецот повторно ќе бара нова дестинација за продолжување на својата кариера.