Балканскиот медиумски камион ја започна својата турнеја низ 20 градови во шест земји од Западен Балкан: Косово, Босна и Хецеговина, Црна Гора, Албанија, Северна Македонија и Србија. Турнејата започна вчера и ќе трае до ноември.

Прва станица беше Призрен, а денеска е во Митровица, утре продолжува во Пеќ, а на 11 септември ја заокружува косовската турнеја во Приштина. Во Македонија ќе биде во: Битола на 3-4 ноември, Гостивар 6-7 ноември, Штип 10-11 ноември, Скопје 13-14 ноември.

Балканскиот медиумски камион, како што информираат организаторите, е патувачка платформа во рамките на која се истражуваат вести, слики и критичко размислување.

„На секоја станица, камионот застанува на централни јавни простори и нуди проекции, квизови и разговори за тоа како настануваат информациите, како се споделуваат и како ги доживуваме. Можност да се собереме, да размениме мислења и да ги согледаме вестите од друга перспектива. Целта е да се поттикне критичко размислување, медиумска писменост и отворен дијалог за улогата на информациите и влијанието на дезинформациите во секојдневниот живот.

А зошто да зборуваме за медиумска и информациска писменост? Затоа што сите сме постојано изложени на најразлични вести – на социјалните мрежи, преку медиумите или едноставно на улица. Но како да знаеме што е вистина, што е преувеличување, а што е целосна измислица? Медиумската и информациската писменост ни помага да разликуваме факти од измислици, да разбереме како се создаваат вестите и да го зајакнеме критичкото размислување“ велат претставниците.

Доколку сакате да дознаете повеќе, погледнете ја целата програма, говорниците, распоредот и локациите на следниов линк: https://balkan-voices.com/BALKAN-NEWS-TRUCK/ .

Балканскиот медиумски камион е иницијатива што ја спроведува CFI – Француската Агенција за развој на медиуми во партнерство со Фондацијата за интернет и општество Метаморфозис, а со поддршка на Министерството за Европа и надворешни работи на Франција, во рамките на проектот Shared Horizons.