Македонскиот репрезентативец Доријан Бабунски не можеше да посака подобар почеток во новиот клуб и само еден ден по потпишувањето договор со унгарскиот Ниреѓихаза дебитираше и веднаш се запиша во листата на стрелците.

На пријателскиот натпревар против хрватската Локомотива Загреб, што се одигра во Словенија како дел од подготовките, Бабунски го постигна единствениот гол за својот тим во ремито 1-1. Стрелаше во 65. минута, откако претходно Локомотива дојде во водство преку Силвио Горичан.

Бабунски во Ниреѓихаза пристигна од романскиот Сепси, а претходно настапуваше и за неколку европски клубови меѓу кои и Дебрецин, Грасхоперс, Ботев Враца и други. Овој погодок е најава за тоа што македонскиот напаѓач може да понуди во новата сезона во унгарскиот фудбал.