Австралиската влада официјално ги стави коалите на листата на загрозени животни по падот на нејзиниот број поради катастрофалните шумски пожари кои ги намалија нивните живеалишта, пишува Гардијан.

Министерката за животна средина, Сузан Леј, ја прифати препораката на научниот комитет за загрозени видови дека на популациите на коалите во Квинсленд, Нов Јужен Велс и австралиската престолнина треба да им се подобри статусот на зачувување.

Ова доаѓа откако владата на премиерот Скот Морисон минатиот месец објави дека ќе вложи 50 милиони долари за помош на коалите. Финансирањето беше поздравено од еколошките групи, но беше опишано како „капка во океанот“ доколку не се решат основните причини за нивното изумирање.

Леј изјави дека покрај тоа што ги ставиле коалите на загрозената листа, владата планира да го усвои долгоочекуваниот национален план за обновување на коалите.

„Денес ја зголемуваме заштитата за коалите во Нов Јужен Велс, Викторија и Квинсленд, наведувајќи ги како загрозени наместо нивна претходна ознака како ранливи видови“, рече Леј.

Организациите за животна средина долго време тврдат дека статусот на зачувување на коалата треба да се надгради.

„Коалата стана загрозен вид на австралискиот источен брег во рок од една деценија“, рече Дермот О’Горман, извршен директор на WWF-Australia.

Со класифицирање на коалите како загрозен вид ќе се обезбеди дополнителна заштита за овие животни, смета Леј.

Планот за зачувување ги поставува клучните закани за коалите и активностите потребни за да се спречи нивното истребување.

Откако ќе се усвои планот за закрепнување, министрите се законски обврзани да не носат одлуки што не се во согласност со него, но владите немаат обврска всушност да го спроведат планот.

Коалите се под притисок од повеќе тековни закани, вклучувајќи болести, глобално затоплување и намалување на нивните живеалишта.

Масакр на коали во Австралија: 126 обвиненија поради убивање на заштитените животни