Австралија ќе инвестира 12 милијарди долари (6,8 милијарди евра) за опремување на едно од своите бродоградилишта за изградба на флота од нуклеарни подморници, објави владата во Канбера, пишува Н1.

Министерот за одбрана Ричард Марлес изјави дека 12-те милијарди австралиски долари ќе бидат потрошени во текот на десет години за реновирање и подобрување на капацитетот на бродоградилиштето Хендерсон, во близина на Перт во Западна Австралија.

Австралија, Велика Британија и САД го потпишаа договорот Аукус во 2021 година, чија цел е да се спротивстави на растечкото влијание на Кина во Азиско-пацифичкиот регион.

Марлес изјави за „Скај њуз“ дека бродоградилиштето Хендерсон е клучен дел од договорот Аукус.

„Станува збор за тоа што Австралија треба да направи за да ја искористи оваа стратешка можност“, додаде министерот за одбрана.