Би било премногу наивно да се очекува дека мандатарот кој е и иден премиер ќе направи геополитичко свртување во однос на неговата реторика и истата таа ќе спласне, рече аналитичарот Благојче Атанасовски во интервју за „Слободен Печат“.

„Јас првите политички потези на претседателката но и на мандатарот кој ќе биде премиер и ќе ја води надворешната политика, заедно со претседателката гледам дека одат не кон заострување на односите со соседите, туку кон отворање некое жариште на еден политички вулкан кој беше активен 27 години и кој на еден начин спласна со потпишувањето на Преспанскиот договор“ посочи тој.

Според Атанасовски, ако Грција одново го употреби инструментот вето, во период кога веќе има една блокада од Бугарија, тоа катастрофално лошо би се одразило врз државата.

„Сега, одново се сака да се направи еден вид на ерупција во меѓудржавните односи меѓу Македонија и Грција. Ако мене ме прашате, тоа ќе биде катастрофално по целокупниот историски, државен, политички и севкупен развој, ако Грција повторно го употреби инструментот вето, во ситуација кога ние се уште не сме ги почнале преговорите со ЕУ, поради условеното вето од Бугарија и за првпат ние може да имаме удвоено вето, усогласено меѓу Атина и Софија. Верувајте, во тој геополитички сооднос меѓу Скопје Атина и Софија ние нема да можеме да го најдеме од тој евроинтегративен ќор-сокак. Тој ќор-сокак според мене, ќе предизвика невидени политички и меѓуетнички проблеми во државата“ посочи Атанасовски.

Објаснувајќи како се случи во Собранието и пратеници на ДУИ да гласаат за предложениот Закон за реорганизација на министерствата, политичкиот аналитичар Атанасовски истакна дека тоа покажало дека Христијан Мицкоски немал двотретинско мнозинство како што најавувал и затоа морал да се договара со ДУИ.

„Кога дојде до Собранието да се гласа, на Христијан Мицкоски очигледно му фалеа двајца тројца пратеници, бидејќи постојното парламентарно мнозинство на ВМРО-ДПМНЕ, Вреди и ЗНАМ е околу 78 пратеници, значи тие два пратеника тој ги немал, па затоа влегол во создавање на договор со Европскиот фронт и со ДУИ, што беше изненадување за граѓаните“ вели Атанасовски.

Според него, ВМРО-ДПМНЕ уште на почетокот од својот мандат како владејачка партија успеал да разочара дел од гласачите и членовите, затоа што во кампањата таа партија тврдеше дека ќе стави крај на владеењето на ДУИ.

„Целата предизборна кампања се сведе на еден вид на политички судир, помеѓу ВМРО-ДПМНЕ и ДУИ, дури мислам дека огромниот резултат и масовната поддршка што ВМРО-ДПМНЕ ја доби на изборите се должеше на тоа што постојано велеше дека ќе ја испрати ДУИ во опозиција по дводецениско владеење, бидејќи имаше насоборан гнев и анимозитет кај македонските граѓани, пред се кај етничките Македонци“ посочи тој.

Целото интервју погледнете го во продолжение: