Активниот бојкот во Собранието функционира, меѓутоа во текот на 2022 година над 30 закони кои се во интерес на граѓаните се поминати во Собранието на Република Македонија и не биле цел на бојкот, рече вечерва портпаролот на ВМРО-ДПМНЕ, Димче Арсовски, во гостувањето во „Топ тема“ на ТВ Телма.

„Она што се бојкотира, нормално е да се бојкотира бидејќи не е во интерес на граѓаните, во теснопартиски интерес на власта еве на пример конкретно изминативе неколку дена сведоци сме на предлозите за уставни судии. Практично каде што власта по секоја цена се обидува да избере уставни судии кои што ним им се блиски и ним им се важни да бидат избрани, а воопшто немаат практично никакво портфолио за да седнат на тоа столче, а беа добри кадри други предложени од страна на опозицијата од ВМРО-ДПМНЕ и беа одбиени“, рече Арсовски.

Тој додаде дека власта „продолжува со голата политика, со фокусот кон ВМРО-ДПМНЕ, кон оцрнување, она што го прави по цели денови“.

„Власта троши народни пари на спотови со цел на оцрнување на ВМРО-ДПМНЕ наместо да се фокусира на решавање на реалните проблеми“, рече Арсовски.

„Она коешто исто така ВМРО-ДПМНЕ го имаше предложено во текот на пролетта, уште тогаш говоревме дека ни претстои сериозна економска и енергетска криза, предложивме тимови во неколку области да работат заедно со тимови од власта во надминување на проблемите и на кризите кои што ги има и следат на Република Македонија, но тие беа одбиени од страна на власта. Зошто беа одбиени? Беа одбиени затоа што им сметаше некој навистина да направи нешто добро за државата бидејќи така би им го нарушил комодитетот на крадење, на пљачкање на државата и на пљачкање на народните пари“, рече тој.