Портпарол на ВМРО-ДПМНЕ, Димче Арсовски на денешната прес-конференција изјави дека иако поранешниот министер за здравство Венко Филипче не е министер, а „сѐ уште излегуваат скандали за сомнежи за криминал согласно неговото работење изминативе четири години“.

Деновиве од медиумите јавноста дознава дека Венко Филипче искористил вакуум период кога јавноста се занимаваше со смената на Заев и со циркусот што го приредуваше СДСМ, токму Венко Филипче тогаш во тој вакуум период и исплатил на грчката компанија Интракат која го гради Клиничкиот Центар во Штип дури 2.5 милиони евра, вели Арсовски.

-Да поедноставиме, од Клиничкиот Центар во Штип нема ни траг ни глас дека ќе се заврши, веќе 5та година СДСМ како Влада го прави и го завршува, а повеќе од 2 години, замислете, нема ниту мајстори и не е поместена ниту една цигла, не е закована ниту една шајка, додава тој.

Е сега, откако ЕБРД го раскинува договорот со Интракат заради незавршени обврски за кои се заложиле во врска со изградбата и буквално никој, ама никој тука кај нас во владава не го интересира до каде е изградбата на клиничкиот, Венко Филипче на неколку недели пред одење, односно заминување од функцијата министер за здравство, префрла 2.5 милиони евра за проект кој е незавршен и нема најава дека ќе биде завршен во блиска иднина, изјави Арсовски.

Како што вели портпаролот на ВМРО-ДПМНЕ, „иако компанијата Интракат била блокирана од страна на судот тука во Македонија, Граѓанскиот суд, токму оној кој ја блокирал сметката на фирмата за неподмирени долгови на над 600 македонски компании, веднаш по локалните избори кога била извесна оставката на Заев и на Венко Филипче, ја одблокирал сметката на 90 дена на истата оваа фирма и токму во тие 90 дена Венко Филипче исплатил од парите на граѓаните 2.5 милиони евра и потоа си заминал од функцијата“.

Фирмата Интракат парите кои и легнале од Венко, наместо да подмирува обврски или да ги употреби за работа на клиничкиот центар, таа ги испумпала од државата надвор, заклучува Арсовски.