Денеска во Англија се уапсени пет лица поради расистичките напади на фудбалерите на „Гордиот Албион“ по финалето на Европското првенство. Букајо Сака, Маркус Рашфорд и Џејдон Санчо не беа прецизни во пенал серијата против Италија во финалето на Евро 2020, и по поразот на Англија беа мета на расистички напади и навреди на социјалните мрежи.

Комплетната репрезентација на Англија но и фудбалската јавност застанаа во одбрана на младите фудбалери, а полицијата денеска соопшти дека веќе уапсила пет лица. Началникот на полицијата изјави дека „злоставувањето“ на фудбалерите било дрско.

– Доколку утврдиме дека стоите зад овој чин, ќе ви влеземе во трагата и ќе мора да се соочите со сериозни последици поради своите срамни постапки – порача началникот Марк Робертс.
Полицијата исто така соопшти дека во цела Англија се регистрирани 897 инциденти поврзани со фудбалот и дека биле извршени 264 апсења во период од 24 часа пред и по натпреварот Англија – Италија.