Апелациониот суд ја блокираше одлуката на Трамп за депортирање на група Венецуелци
Американскиот федерален апелационен суд ја блокираше одлуката на администрацијата на претседателот Доналд Трамп за депортирање на група Венецуелци врз основа на закон стар два века, објавија денес американските медиуми.
Препорачано
Конзервативниот 5-ти окружен апелационен суд доцна синоќа пресуди дека не се случила странска инвазија опфатена со Законот за странски непријатели од 1798 година, објави Блумберг.
Со оваа одлука, најверојатно е подготвен теренот за конфронтација меѓу Трамп и застапниците за граѓански права пред Врховниот суд на САД, според агенцијата.
Пресудата се однесува на одлуката на Трамп да употреби воена состојба за депортирање на група мажи обвинети дека се членови на насилната банда Трен де Арагуа од Венецуела.
Претседателот тврдеше дека присуството на членови на оваа банда претставува „инвазија“ или „упад од странска држава“, како што е дефинирано со закон од пред два века.
Одлуката на судот доаѓа во време кога мерките на Трамп против недокументираните имигранти продолжуваат да се соочуваат со правни предизвици низ САД.
Одлуките на 5-тиот окружен суд се применуваат во неколку држави, вклучувајќи ги Тексас и Луизијана, каде што се притворени многу мигранти кои чекаат депортација, потсетува Блумберг.
