Од Движењето „Антикоцкање“ денеска на прес-конференција најавија дека нема да се откажат од нивните првични барања – сите објекти во кои се приредуваат игри на среќа да бидат целосно преместени од градовите и селата, односно казината и обложувалниците да мора да бидат оддалечени најмалку три километри од кое било населено место.

„Некои работи почнаа да се движат од нулта точка. Но, со овој Предлог закон се овозможува казината и обложувалниците да се доближат до универзитетите. Во Предлог закон не е споменато оддалечување од универзитетите. Се прашуваме каде останаа градинките, каде останаа јавните институции. Ова барање е пред седум години, два амандмани дадовме, едно време се согласија, да нема игри на среќа и пред верски објекти, центарот на градот, градинки и сите други институции, ние повторуваме дека треба да се внесат и тие објекти. Да не се дозволи и на тие објекти да им се приближат, а буџетот не треба да се полни од пороци, истакна Џемал Абдиу од Движењето Антикоцкање.

Од „Антикоцкање“, велат дека се неосновани тврдењета на Асоцијацијата на спортски обложувалници и Асоцијацијата на приредувачи на игри на среќа дека со новиот владин предлог закон ќе се отвори простор да има нелегално коцкање и обложување.

„За тоа има закони и држава. Но ние истото ќе го прашаме зарем сега нема сива економија. Истото сме го прашале и поранешниот премиер, знаеме дека има, секој ден се среќаваме со такви потфати што држава треба да се грижи. Државата треба да размисли, тоа спаѓа во закана за државата, како може да има сива економија, кога функционира државата. Ако е „сива државата“ тогаш може да функционира и сивата економија и казината и спортските обложувалници. Пред седум години предложивме да има таканаречени зелени зони надвор од населените места каде ќе функционираат објектите на игри на среќа“, рече Јуши Емурлаи од движењето Антикоцкање.

Со новиот владин предложен закон се предвидува казината и обложувалниците да бидат на оддалеченост не помалку од 500 метри од основни и средни училишта.

Друга важна измена во новиот предлог законот за игри на среќа, како што посочија од Владата е тоа што обложувалниците, доколку се регистрирани како такви, нема да можат да организираат и други игри на среќа со истата лиценца. Се најавува и затегнување на процедурата за издавање лиценци за игри на среќа.