Повеќе од две третини од Французите – 71 процент ја поддржуваат идејата Франција да стане федерална држава,  се наведува во анкетата спроведена од  институтот Ифоп.

Според анкетата, 68 проценти од испитаниците веруваат дека локалните власти имаат „премалку моќ во споредба со државата“, што е зголемување од 18 поени во споредба со 2012 година, објави Фигаро.

Поддршката за децентрализација е особено изразена кај постарите граѓани, жителите на руралните средини и гласачите на лидерката на француската крајно десничарска партија Национален собир, Марин Ле Пен.

Мнозинството испитаници – 73 проценти ја поддржуваат можноста регионите да ги прилагодат националните закони на локалните услови, додека 68 проценти се залагаат за нова прераспределба на големите региони со цел повеќе да се земат предвид културните и историските специфичности.

Анкетата, исто така, покажува дека 77 проценти од Французите го поддржуваат официјалното признавање на регионалните јазици, а 84 проценти го поддржуваат воведувањето на регионалната историја во училишната програма.

Речиси едногласно мнозинство – 90 проценти веруваат дека централната држава е „премногу оддалечена од локалната реалност“, додека 82 проценти оценуваат дека медиумите се „премногу фокусирани на Париз“.

Анкетата е спроведена онлајн од 11 до 25 јули на примерок од 2.000 граѓани постари од 18 години.