Украинскиот министер за надворешни работи Андриј Сибиха денеска изјави дека Киев не е пречка за мировниот договор со Русија и оти верува дека може да се постигне праведен и траен мир под водство на американскиот претседател Доналд Трамп.

Украина чека разјаснување за мировниот процес по разговорите меѓу Трамп и рускиот претседател Владимир Путин, кои се очекуваат подоцна во текот на денот, изјави Сибиха на конференција во Њу Делхи, пренесува Ројтерс.

Американскиот претседател Доналд Трамп најави дека денеска ќе разговара со рускиот претседател Владимир Путин за војната во Украина и рече дека многу елементи од конечниот мировен договор се веќе договорени, но дека треба да се направи уште многу.

„Илјадници млади војници и цивили ги губат своите животи. 2.500 војници умираат секоја недела од двете страни и овој конфликт мора веднаш да заврши“, напиша Трамп на веб-страницата „Truth Social“, додавајќи дека со нетрпение очекува да разговара со Путин.

Кремљ вчера потврди дека Трамп и Путин денеска ќе имаат телефонски разговор, пренесува Танјуг.