Министерот за дигитална трансформација Стефан Андоновски вели дека пораките што во петокот ги добиј училиштата, со предупредувања за поставени експлозивни направи, а за кои се утврди дека се лажни дојави по проверките од полицијата, се хрибридни закани.

– Разликата од претходно е што веднаш, уште утрото, се слушнавме со министеркатаза образование, организиравме ад хок група со министерот за внатрешни работи која ги разгледа проблемите со кои се соочува системот, развивме неколку методологии коишто треба да се следат во наредниот период за превентива на подолг рок – изјави Андоновски при посетата на ОУ „Димитар Македонски“ по повод одбележување на Денот на безбеден интернет.

Тој посочи дека МВР, МОН и општините постапиле „многу соодветно во текот на денот“, дека биле решени последиците и оти сега се работи и на причините „зошто ова ни се случува“.

– Хибридни напади ќе има, напади на нашата сајбер инфраструктура ќе продолжат, но многу е важно како институциите одговараат, а сега одговараат системски и во соработка едни со други. Стоиме на располагање да му помагаме на Министерството за образование и наука и на сите други институции ако и понатаму се појават вакви проблеми – рече Андоновски одговарајќи на новинарски прашања.