Патник од САД вчера гризнал стјуардеса на лет, принудувајќи го летот на Ол Нипон Ервејс кој летал за Сиетл да се врати во Токио, изјави портпаролот на авиокомпанијата.

Летот 118 на Ол Нипон Ервејс полетал од аеродромот Ханеда во Токио во 21:47 часот по локално време, но споменатиот инцидент се случил еден час подоцна. Портпаролот на авиокомпанијата изјави за Си-Ен-Ен дека полицијата привела патник веднаш по слетувањето во Јапонија, но не го откри неговиот идентитет.

Портпаролот додаде дека стјуардесата се здобила со полесни повреди. Ова не е прв пат патник да гризне персонал на лет. Во 2022 година, двајца патници добија високи казни за удирање и гризење на екипажот и другите патници на одделни летови.

Едниот бил казнет со 81.950 долари, а другиот со 77.272 долари. Ова се двете најголеми казни што Федералната управа за авијација на САД им ги изрекла на патниците поради нивното однесување во авион.