САД целосно го вратија статусот на Унгарија во рамките на Програмата за ослободување од виза на САД, соопшти администрацијата на американскиот претседател Доналд Трамп во понеделник. Одлуката е еден од првите опипливи знаци за подобрени односи меѓу владите на САД и Унгарија под администрацијата на Трамп, објави Ројтерс.

Програмата за ослободување од виза на САД им овозможува на граѓаните на околу 40 земји да патуваат во САД за престој до 90 дена без виза. Во 2021 година, Министерството за внатрешна безбедност на САД ги поништи електронските патни овластувања што веќе беа издадени на сите носители на унгарски пасоши родени надвор од Унгарија и продолжи да одбива нови апликации за таа категорија.

Во август 2023 година, администрацијата на поранешниот претседател Џозеф Бајден го намали периодот на важење за унгарските патници од две години на една година, а истовремено ги ограничи електронските овластувања на еднократна употреба, објави Танјуг.

„Сега кога унгарската влада ги презеде мерките што ги побара американската влада за решавање на безбедносните проблеми, ограничувањата што ги наметна претходната администрација се укинати“, соопшти Министерството за внатрешна безбедност (DHS).