По успешната соработка од 2017 година, коалицијата меѓу СДСМ и ДУИ на есенските локални избори е логична и нивна потреба, смета политичкиот аналитичар, Фатон Алити.

Тој, додава дека посебно на СДСМ сега му треба повеќе ваква коалиција.

– Целта на било која политичка партија е моќ за да спроведе политики за кои тие се убедени дека се во најдобар интерес на државата и граѓанинот. ДУИ ја надмина кризата од 2015-2017 година, беше реформирана и се етаблира пак како прва политичка сила меѓу Албанците во Македонија. СДСМ по налетот и ентузијазмот од 2015-2017 година се соочува со стагнација, дури и со намалена поддршка, што е потврдено со резултатите од изборите во 2020 година. Во овие околности, и по успешната соработка од 2017 година, мислам дека нивната коалиција е логична и нивна потреба – изјави за „Слободен печат“, Алити. 

Посебно, додава тој, на СДСМ сега му треба повеќе ваква коалиција.

– Поради грубата национална реторика на ВМРО и Алијанса, коалицијата меѓу нив би била поштетна отколку корисна – нагласува Алити.