НАТО ќе остане силно посветен на безбедноста и стабилноста на Западен Балкан, кој има „стратегиско значење за Северноатлантската алијанса“, се наведува, меѓу другото, во заедничката декларација усвоена на Самитот во Вашингтон.

– Ќе продолжиме да го подобруваме политичкиот дијалог и практичната соработка со Западен Балкан со цел да ги поддржиме реформите, регионалниот мир и безбедност и да се спротивставиме на малигните влијанија, вклучувајќи дезинформации, хибридни и кибернетски закани од државни и недржавни актери – се истакнува во декларацијата.

Во документот се додава дека „демократските вредности, владеењето на правото, домашните реформи и добрососедските односи се од витално значење за регионалната соработка и евроатлантските интеграции“ и дека се очекува континуиран напредок на тој план.

НАТО останува посветен на континуиран ангажман на Западен Балкан и преку Косовските сили (КФОР).