Верувале или не, Александра Пријовиќ ја најави петтата загрепска Арена и стана апсолутен рекордер по бројот на закажани настапи во Арената Загреб и со тоа го потврди статусот на најбарана регионална ѕвезда.

“Петта арена, петта ноќ на љубовта и петпати ви благодарам! Горда сум и благодарна од сѐ срце за количината на љубов и поддршка што ми ја давате. Не знам што друго да ви кажам – освен дека ве сакам и едвај чекам да уживаме и да создадеме спомени кои ќе ги негуваме и засекогаш ќе ги паметиме. Верувајте ми дека секоја вечер во Загреб ќе биде посебна“, им порача Пријовиќ на своите фанови преку Екстра ФМ при гостувањето во Загреб.

Александра Пријовиќ на 6 декември по петти пат ќе застане пред фановите и ќе ги пее хитовите за кои досега билети купиле близу 70.000 луѓе. Со петтата Арена, можеме да зборуваме за бројка која се приближува до неверојатни 90.000 фанови.

Хрватската јавност со денови се занимава со Александра Пријовиќ, иако нема сомнеж дека е миленичка на загрепската публика. Некои се згрозени што фолкерите во Хрватска имаат толку многу обожаватели, додека други не гледаат проблем во тоа и оставаат на луѓето да уживаат во жанрот што им одговара.

Пријовиќ овој месец три пати ја наполни белградската Штарк Арена, но се чини дека има повеќе обожаватели во Хрватска. Пријовиќ во својата кариера сними три албуми, а последниот албум „Nine Lives“ ги собори сите рекорди на слушање и ја одведе на турнејата „Од истока до запада“, каде што моментално ги полни големите сали низ регионот. Во моментов најголем интерес има за концертите во Хрватска.