Јоан Пелуши е избран за нов поглавар на Автокефалната православна црква на Албанија, а тоа беше соопштено со биење на камбаните на црквата „Воскресение Христово“ во Тирана, по заседавањето на Синодот, јавија локалните медиуми.

Светиот синод го избра новиот архиепископ за Тирана, Драч и цела Албанија, кој ќе го наследи починатиот архиепископ Анастасиј. По објавувањето на името на новиот архиепископ, биеја камбаните во сите катедрали и цркви во Албанија. Архиепископ Јоан, пред да биде привремен вршител на оваа должност, беше митрополит на Корча. На 29 март ќе се одржи голема церемонија на устоличување, објавија медиумите.

Пелуши е роден на 2 јануари 1956 година во Тирана, се школувал и магистрирал на Теолошки универзитет во САД, бил професор на Теолошкиот факултет во Албанија и негов декан. Во 1997 година тој станал архимандрит, а една година подоцна и митрополит на Корчанската митрополија.