Министерството за правда на САД и ФБИ заклучија дека нема докази дека осудениот сексуален престапник Џефри Епштајн уценувал моќни личности, имал „клиентска база“ и бил убиен во затворот.

Според извештајот на агенцијата, до кој дојде „Аксиос“, неговата смрт во затворската ќелија се припишува на самоубиство.

Ова е првпат администрацијата на Трамп официјално да ги негира теориите на заговор за активностите и смртта на Епштајн.

Владата, исто така,  објави видео на кое се гледа дека никој не влегол во затворот на Менхетен каде што бил држен Епштајн ноќта кога починал во 2019 година, додека во извештајот на судскиот вештак се наведува дека тој извршил самоубиство.

На видеото што е објавено, кое трае само неколку секунди , Епштајн, облечен во портокалова униформа, се гледа како двајца чувари го водат во неговата ќелија вечерта на 9 август 2019 година, во 7:49 часот, а следниот ден бил пронајден мртов.

Според меморандумот, истражителите внимателно ги испитале снимките од затворската ќелија на Епштајн на Менхетен од 22:40 часот на 9 август 2019 година, кога бил заклучен во својата ќелија, па сè до околу 6:30 часот наутро следниот ден, кога бил пронајден во несвест. И не виделе никој да му се приближува на затвореникот.

Исто така, истражителите немаат докази дека Епштајн имал список на клиенти или дека уценувал важни личности, додека „нема докази што би можеле да утврдат истрага против необвинети трети страни“, се наведува во меморандумот.

Минатиот месец, Илон Маск го обвини Доналд Трамп дека е на „листата“ на Епштајн. Трамп објави изјава на Трут Сошал од поранешниот адвокат на Епштајн, Дејвид Шон, во која се вели дека тој не е вмешан во никакво кривично дело. Шон го застапуваше Трамп во неговото прво судење за импичмент.

Маск подоцна ја избриша објавата, велејќи дека „претерал“.

Министерството за правда и ФБИ, исто така, наведуваат во меморандумот дека не би било „соодветно или оправдано да се направи понатамошно откривање“ на материјалот поврзан со Епштајн.

Во меморандумот се наведува дека голем дел од материјалот се однесува на сексуална злоупотреба на деца, детали за жртвите на брокерот и информации што би разоткриле невини луѓе.

„Преку овој преглед, не најдовме основа за преиспитување на објавувањето на овој материјал и нема да дозволиме објавување на детска порнографија“, се наведува во меморандумот.