Ако падне договор и со новиот закон за амнестија да бидат опфатени и сторителите на изборни нерегуларности и осудените од случајот „27 април“, Алијанса за Албанците со милион амандмани ќе го блокира законот во Собранието, изјави за „Слободен печат“ министерот за правда Кренар Лога. Како што веќе објавивме, СДСМ и ДУИ се спремни за 30 отсто да им ги намалат казните и на осудените за изборен криминал и за злосторничко здружување, ако од ВМРО-ДПМНЕ добијат гаранции дека ќе поминат уставните измени. За ова, Димитар Ковачевски и Али Ахмети ќе треба да се соочат и со третиот владин партнер Арбен Таравари. Новиот закон за амнестија, кој се однесува за полесни кривични дела со цел да се намали пренатрупаноста во затворите, се очекуваше денеска да помине на владина седница.

Како што веќе објавивме, ако падне договор меѓу власта и опозицијата за овој закон, пратениците ќе интервенираат преку амандмани. Втората варијанта е законот сега да биде донесен како што е предложен од Министерството за правда, а подоцна, доколку падне договор меѓу власта и опозицијата, новиот закон да претрпи измени. Официјално, и власта и опозицијата негираат дека се подготвува таков договор.

– Такво нешто воопшто не е на маса за преговори, но и доколку СДСМ, ДУИ и ВМРО-ДПМНЕ се договорат и се обидат да го донесат, Алијанса за Албанците жестоко ќе се спротивстави и ќе го блокира во Собранието со еден милион амандмани – ни изјави Лога.

Според информации на „Слободен печат“, ВМРО-ДПМНЕ барала со новиот закон за амнестија да биде опфатено и делото изборни нерегуларности, но министерот за правда тоа го отфрлил.

Од друга страна, по експресното гласање на измените на Кривичниот законик, големо е незадоволството кај пратениците од СДСМ сега да гласаат за Законот за амнестија, бидејќи тие ќе бидат на удар на јавноста дека во кус рок протуркале две амнестии.

Законот за амнестија до кој дојде „Слободен печат“ уредува ослободување од извршување казна затвор, односно амнестија на лицата осудени со правосилна пресуда на казна затвор за кривични дела пропишани со Кривичниот законик или со други закони, кои на денот на влегувањето во сила на овој закон започнале или не започнале со издржување на казната затвор во казнено-поправните установи, на лицата осудени со правосилна пресуда на казна затвор за кривични дела пропишани со кривични закони на друга држава доколку сторителот е државјанин на Македонија и казната ја издржува во Македонија врз основа на извршување на кривична пресуда на странски или меѓународен суд и е признаена со пресуда на надлежен суд во Македонија.

Законот предвидува целосно ослободување осуденици на кои им е изречена казна затвор до шест месеци. На осудениците со казна затвор над шест месеци се ослободуваат од издржување на 30 отсто од целокупната казна изречена со правосилна пресуда.

„Осудените лица од членот 1 од овој закон на кои со правосилна пресуда им е изречена единствена казна затвор, се ослободуваат од издржување на единствената казна затвор за 30 отсто во делот на претходно утврдените поединечни казни опфатени со амнестија. Доколку во единствената казна затвор е утврдена казна затвор за кривично дело што не подложи на амнестија, осудениот од членот 1 од овој закон ќе се ослободи од издржување на казната за 30 отсто само во делот на претходно утврдените поединечни казни опфатени со амнестија“, се вели во Предлог-законот.

Амнестијата не се однесува на лицата осудени со правосилна пресуда: „на казна доживотен затвор, за убиство од членот 123 од Кривичниот законик, за кривични дела против изборите и гласањето, против половата слобода и половиот морал, за кривични дела против државата, против јавниот ред, човечноста и меѓународното право“. Амнестијата и намалувањето на казните нема да се однесува за кривичните дела перење пари од член 273, злоупотреба на службени овластување од член 353, давање награда за противзаконито влијание од член 358-а и за примање награда за противзаконито влијание од член 359 од Кривичниот законик. Амнестијата нема да важи ни за осудениците на семејно насилство и родово базирано насилство, како ни на лицата што делата предмет на амнестија ги сториле по 1 септември 2023 година. Амнестија ќе нема ни за избрани и именувани лица, ниту, пак, на веќе амнестирани лица според Законот за амнестија од 2018 година. Амнестија не се однесува на правосилно осудени лица за кои до денот на влегувањето во сила на овој закон е наредено издавање потерница поради нивна недостапност на органите на кривичниот прогон.

Како што веќе објавивме, новиот закон за амнестија треба да биде втор од пакетот што власта го „нуди“ на опозициската ВМРО-ДПМНЕ за таа да гласа за уставни измени. Лога се противел и на носењето на измените на Кривичниот законик и поради тоа, заменичката министерка за правда Викторија Мадиќ беше предлагач на законските измени. Според наши информации, два месеца траеле убедувањата Лога да биде предлагач на измените на КЗ, но дека позициите на министерот биле оти не може да биде потписник, зашто Алијанса за Албанците (АА) влегла во Владата заради уставните измени и заради борбата против криминалот и корупцијата. Токму поради тоа, ниту еден од пратениците на Алијанса за Албанците не гласале за измените на КЗ.