Европската служба за борба против измами (ОЛАФ) со седиште во Брисел подготвила препораки за европските институции и за македонските власти во однос на злоупотребата на европските фондови, потврди евроамбасадорот во земјава Дејвид Гир. Доколку истрагите на ОЛАФ завршат со сомнеж за криминални активности, случаите ќе бидат проследени во Јавното обвинителство.

Од македонската служба за ревизија на ИПА-фондовите за „Слободен печат“ неофицијално велат дека е точно оти ОЛАФ има отворено 18 истраги за злоупотреба на европски фондови, но тоа не значи дека сите ќе завршат со препораки или со казни.

– Тоа што Северна Македонија е единствената земја со толку многу случаи, тоа не значи дека системот не функционира и дека сите ќе резултираат со препораки или казни – ни изјавија од службата за ревизија на ИПА-фондовите.

Оттаму додаваат дека бројката на случаи делумно е голема и поради тоа што секој може да пријави евентуална злоупотреба или сомнеж, за што подоцна, ако има основа, се спроведува истрага. Истовремено потсетуваат дека соработката и комуникацијата со ОЛАФ е одлична и дека нивната оценка е дека земјава има најдобар систем на користење на европските фондови.

Сепак, за конкретни случаи никој не сака да зборува додека трае истрагата за да не може изјавите политички да се злоупотребуваат.

Според амбасадорот Гир, пак, доколку истрагите на ОЛАФ покажат сомнеж за криминални активности, тие случаи ќе бидат проследени во Јавното обвинителство и во тој случај ЕУ очекува јавниот обвинител да преземе навремени активности, а тие активности Брисел ќе ги следи одблиску.

– Ова покажува колку сериозно ЕУ пристапува и го проверува начинот на кој парите од европските даночни обврзници се трошат во Северна Македонија. Сакам да потенцирам дека ОЛАФ е многу сериозно тело, кое спроведува истраги за тоа како се трошат парите на ЕУ. Ја потврдувам бројката, но не ги знам деталите во врска со самите истраги. Можам да потврдам дека има различни субјекти, кои се дел од тие истраги – изјави Гир при посетата на Битола.

Според него, луѓето што ги злоупотребуваат парите на европските даночни обврзници, всушност ги мамат и граѓаните на Северна Македонија.

Европската служба за борба против измами (ОЛАФ), одговорна за ревизија на фондовите за земјите членки на Европската Унија и за други држави кориснички, во последните пет години отворила 36 истраги за земјите од Западен Балкан за злоупотреба или неправилности поврзани со европските фондови, од кои 18 се однесуваат на злоупотреба на европските фондовите во земјава. ОЛАФ подготвила седум препораки за европските институции и за македонските власти.

Од службата нема дополнителни информации за конкретните истраги, но објавено е дека за европските фондови, кои се потрошени целосно или делумно на национално или на регионално ниво во 2022 година, во Македонија биле отворени четири истраги, а три се затворени со соодветни препораки.

Европските фондови најзлоупотребувани во Македонија, објави ОЛАФ