Тесно ѝ е на Академијата за судии и јавни обвинители – во просторот што го користи од 906 метри квадратни нема доволно место за квалитетна обука на слушателите, па АСЈО не може да одговори на барањата на судовите и јавните обвинителства и да прими слушатели на почетна обука. Иако биле предвидени пари и е утврдена итност Академијата да добие свој објект, Владата до денес не донела соодветна одлука за тоа, па, следствено, судовите и обвинителствата низ Македонија се уште не се доекипирани со потребниот број на кадри за квалитетно и ефикасно функционирање. Овие наводи се дел од ревизорскиот извештај за тоа со колава ефикасност е спроведена Стратегијата за реформи во правосудниот сектор 2017-2022 и Акцискиот план за нејзиното спроведување.

Во Стратегијата е наведено дека просторните капацитети во која е сместена Академијата за судии и обвинители се несоодветни, неадекватни и недоволни за реализација на нејзините цели и задачи и е неопходно да се обезбедат соодветни услови за ефикасно функционирање. Во Акцискиот план, пак, е наведено дека особено е потребен простор за обука за да се оствари потребното кадровско и техничко доекипирање, затоа што, како што се вели во ревизијата, „со поголеми просторни капацитети, соодветни на стандардите за вршење едукација и континуирано усовршување, АСЈО може да обезбеди подобри услови за учење и работа, поквалитетна обука за слушателите, односно судиите, јавните обвинители и помошниот персонал во судството и стекнување на поквалитетни практични искуства при процесот на едукација“. Затоа во Акцискиот план е дефинирана мерката – изградба на нови просторни услови и превидено е да се реализира континуирано од почетокот на 2019 година до 2022 година. Било потребно Владата да донесе одлука, а биле испланирани и пари во износ од 146 милиони денари (2,3 милиони евра), со дефиниран индикатор на успешност – обезбедување на нови простории за АСЈО.

– Со извршената ревизија утврдено е дека дефинираната активност не е јасна, прецизирана за што се однесува, односно што треба да е предмет на одлуката на Владата и истата не е усогласена со мерката и целта од Стратегијата. Поставениот индикатор на успешност е да се обезбедат нови простории и истиот не е јасно дефиниран, не е мерлив во однос на колкави просторни капацитети треба да задоволи новиот објект, со применети стандарди за вршење на едукативен процес и слично. Индикаторот за успешност делумно се следи бидејќи транспарентно не се известува за статусот на реализација на мерката. Предвидениот рок за постапување по оваа мерка со Акцискиот план е прецизно дефиниран и временската рамка дава можност за непречено и ефикасно спроведување на активноста. Ревизијата констатира дека Владата на РСМ се уште нема донесено одлука за реализација, за изградба или обезбедување на нови простории на АСЈО во предвидениот рок од 2019 до 2022 година, како и до моментот на вршење на ревизијата – констатира Државниот завод за ревизија.

Планираните пари од Буџетот не се реализирани. Планираните износи, се наведува понатаму во извештајот, делумно се следат и не се ажурираат со Акцискиот план минимум еднаш годишно за да се усогласат со буџетските проекции.

Ревизорите наведуваат дека со постојните просторни капацитети Академијата за судии и обвинители во изминатите години не е во состојба да ја оствари законската обврска за прием на бараниот број на слушатели на новата генерација во почетна обука, како и бројот определен со потребите на Судскиот совет и Советот на јавни обвинители. Согласно Законот за Академијата за судии, вкупниот број на слушатели на почетна обука се определува врз основа на одлуките Судскиот совет и Советот на обвинители, а врз основа на вкупниот број на слободни места за судии и обвинители во основните судови и основните јавни обвинителства.

– Со постоечките просторни и технички капацитети, АСЈО се соочува со неможност актуелно да одговори на барањата за прием во почетна обука на потребниот број на кандидати за пополнување на слободните јавно обвинителски и судиски места, поради што постои потреба од итност на решавање на овие барање – констатира документот.

Ревизорите наведуваат дека од страна на Академијата преземаат активности за надминување на проблемот, односно поднеле барање до Министерството за правда за обезбедување на нови простории.

Ревизорите наведуваат дека за да се реализира проектот потребно е Владата да координира активности за обезбедување на заем од меѓународни финансиски институции и да се обезбеди земјиште или локација во државна сопственост за изградба на новата зграда на Академијата.