Лидерот на ДУИ и предводник на коалицијата Национална алијанса за интеграција, Али Ахмети наместо на завршниот митинг за локалните избори на 19 октомври, ќе присуствува на националниот протест за УЧК во Тирана „Правда за ослободителите“ закажан за 17 октомври.

Од партијата соопштија дека Ахмети, на 17 октомври, последниот ден од изборната кампања, одлучил да ги откаже сите планирани партиски активности и да учествува на националниот протест во Тирана, на покана на организациите кои произлегле од УЧК.

-За ДУИ и нејзиниот претседател, војната на албанскиот народ иницирана од Ослободителната војска на Косово е фер, неопходна и поддржана од целиот демократски, западен и слободољубив свет. Повоените безброј тужби, домашни и меѓународни, јасно ја покажаа дрскоста на таа борба за слобода, демократија и независност. Правдата за албанскиот народ не може да се гради врз политички процеси наметнати од Русија, ниту на „докази“ измислени од Србија. Претседателот Али Ахмети е составен дел од борбата за слобода на албанската нација и поради таа причина силно го поддржува протестот поканет од организациите кошто произлегоа од војната на УЧК, откажувајќи ги сите активности- соопшти партијата.

Ахмети претходно присуствуваше и на протестот организиран во Приштина, како соосновач на Ослободителната војска на Косово.

На Лидерот на ДУИ, вчера пак, Европскиот универзитет во Тирана му ја врачи титулата „Доктор Хонорис Кауса“, за како што се вели во соопштението, историскиот придонес на Али Ахмети во заштитата на албанските права, унапредувањето на мировните процеси и евроатланската ориентација.

-Титулата „Доктор Хонорис Кауса“ е доказ дека жртвите, визијата и долгогодишните напори за правата на Албанците и за европската иднина на земјата се прифатени и ценети на меѓународно академско ниво – соопшти партијата.