На паралелната прослава на 23-годишнината од потпишувањето на Охридскиот рамковен договор, најмногу аплауз од присутните членови и симпатизери на опозицискиот Европски фронт доби говорот на лидерот на ДУИ Али Ахмети кога им порача на македонските власти да не ги делат Албанците на добри и лоши, зашто ако нема добри односи со нив, Македонците како нација нема да постојат.

– Нека чујат сите оние што мислат дека нас Албанците можат да нè поделат на добри Албанци и лоши Албанци. Ние од Фронтот сме лошите Албанци кои бараме правдина. Ние нема да бидеме аргати на никого. Без разлика ако некој мисли дека е ага во оваа земја и дека ги има слугите зад него. Оваа држава ќе оди напред со добри меѓуетнички односи пред сè помеѓу двете поголеми заедници како што се Македонците и Албанците. Македонците како нација можат да напредуваат само во комуникација и усогласеност и добри односи со Албанците инаку ќе ги голтнат Србите, Бугарите и Грците. Ова не ви го велам само на вас туку и на сите други македонски политички претставници. Соживот, соработка, може да ја зачуваме историјата, идентитетот, може да го зачуваат нивниот национален идентитет инаку се дестинирани да не постојат воопшто – рече Ахмети на Академијата за легитимитет, одржана по повод годишнината од Рамковниот договор во хотелот Александар Палас.

Ахмети на Академијата ја предупреди албанска коалиција Вреди која влезе во владата на Мицкоски иако освои помалку гласови и пратенички места од коалицијата Европски фронт дека направиле фатална грешка и газат врз легитимноста на својот народ, но тие ќе продолжат да се борат за заштита на легитимитетот, консултирајќи се со домашни и странски експерти.

– Овој момент нека ни послужи за мобилизација затоа што ние сме победници, затоа што ние сме со правдата и никогаш не сме работеле позади грб на народот и на никого не сме погрешиле. Без никакво размислувања, ќе продолжиме со работа затоа што овој период е привремен, иднината останува на вас кои за 23 години навистина бевте чувари на Рамковниот договор, постигнат со крв не само на борците туку и со крвта на претходните генерации кои се убиени од времето на Неџат Аголи и заврши до најмладите генерации и политичките затвореници кои страдаа низ затворите на Југославија за да може да постојат и да живеат со дигнитет. Ние сме господари на гордоста, на националната гордост и на државотворноста на нашата Република затоа што ние не гледаме друга иднина на некое друго место и затоа што не сме дојдени од некоја друга далечна земја. Но генерациски, од дедо, прадедо, заедно со сонцето во овие простори и судбината на оваа земја ќе ја поделиме заедно со македонската заедница и заедно ќе бидеме посилни, порача Ахмети.

Ахмети како поранешен командант на ОНА кој во 2001 година ги предводеше вооружените групи, на Академијата го истакна значењето на Рамковниот договор како документ кој не само што донесе мир во државата, туку и рамноправност меѓу етничките заедници.

– Така што обележувањето на 23-годишнината од Охридскиот договор да биде со посебна одлика дека оваа држава не се подели затоа што не се согласи ОНА туку се согласи на рамноправност помеѓу двете поголеми заедници и другите помали заедници коишто живеат овде. Затоа ние ја штитиме, се бориме овој договор да не се ризикува затоа што е спас и за Македонците и за Албанците како две најголеми заедници. На имотот кој тие го мислеа во 90-тите години, сопственици сме заедно и заедно ќе излезме на крај и за добро и за лошо – рече Ахмети.