Лидерот на опозициската Демократска унија за интеграција (ДУИ), Али Ахмети, денеска остварил средба со претседателката на Собранието на Албанија, Елиса Спиропали, која е во посета на земјава, информираат од ДУИ. На средбата, според партијата, Ахмети меѓу другото изразил и „загриженост за меѓуетничките односи во Северна Македонија“.

„На госпоѓа Спиропали ѝ ја изразив мојата загриженост во врска со меѓуетничките односи во Северна Македонија, како и за нарушувањето на легитимитетот што произлегува од волјата на народот демократски изразена преку слободно гласање“, порачал Ахмети.

Ахмети и Спиропали разговарале и за прашања поврзани со членството на двете земји во Европската Унија. Тие, според ДУИ, „нагласиле дека како две сојузнички земји, С Македонија и Албанија мора заедно да го продолжат својот пат кон интеграцијата во Унијата“.