Неколку агенции од Македонија пронајдоа начин како во време на пандемија да реализираат туристички патувања и да заработуваат. Тие своите туристички аранжмани ги насочија кон африканскиот континент, за кој се покажа дека има интерес меѓу нашите сограѓани.

За жал, по веста дека маж и жена што дошле од патување во Занзибар се хоспитализирани со коронавирус, се подигна нивото на претпазливост и на 9 март Владата донесе одлука, според која сите домашни и странски патници од земјите од африканскиот континент кои влегуваат на граничните премини на територијата на Република Северна Македонија, задолжително ќе се упатуваат во 14-дневна домашна изолација. По оваа одлука, како што велат од агенциите, тие престанале да ја работат оваа дестинација.

– Ние покажавме иницијативност, не чекавме само Владата да ни даде нешто и затоа почнавме да ја рекламираме и да ја работиме Африка. Но, по одлуката на Владата за карантин, бесмислено е да ја нудиме оваа дестинација. Ја почитувам одлуката на Владата, но сметам дека нема многу логика, односно или треба за сите земји да се затвориме, или не. Која е гаранцијата дека, на пример, јужноафриканскиот сој на вирусот нема да влезе преку Хрватска. Еве, гледаме колку британскиот сој лесно се пренесе насекаде – вели нашиот соговорник, кој потенцира дека поради „црната кампања“ против агенциите по веста за хоспитализирање на патниците од Занзибар, не сака да зборува јавно.

Во однос на патувањата во Африка, тој потенцира дека таму времето е топло, што значи дека сите активности се одвиваат на отворено.

– Секако, не треба да се патува каде било и да не се води сметка за превентивните мерки против вирусот. Короната ја има насекаде и ние сме свесни за тоа. Но, во Африка сега е топло и, реално, подобро е во време на пандемија да се биде надвор, на отворено, на плажа, отколку што сега се случува во Скопје – полни кафеани, на затворено, разни прослави… – вели соговорникот.

Тој вели дека во моментов нема наши сограѓани што се наоѓаат во Занзибар или во некоја друга африканска земја, па да мора по доаѓањето да бидат во карантин.

Туристичкиот сектор е еден од најзагрозените гранки во државата. Овој сектор, заедно со угостителството, беа првите жртви на пандемијата и тие веќе една година работат со големи ограничувања, а во периоди и со целосна оневозможеност да ја вршат својата дејност. Во владините мерки ги има уште во првиот пакет, но државната помош не може ниту целосно да им ги покрие трошоците, ни потенцијалните загуби од неработењето. За сите сектори, а особено за туризмот, е важна имунизацијата на населението, но со оглед на темпото со кое таа се одвива, туристичките агенции, особено оние што се занимаваат со носење туристи од Македонија кон некоја дестинација, сериозно се загрижени дека и оваа година ќе биде загубена во однос на туризмот.