Агенцијата за цивилно воздухопловство ја следи состојбата и е во постојана координација со М-НАВ и досега нема констатирано загрозување на безбедноста на летањето предизвикано од дефектот на радарот, изјавија за „Слободен печат“ од Агенцијата.

Контролорите на летови сега немаат приказ на екран и „рачно“ се слетуваат авионите на скопскиот аеродром. Според последната изјава од Македонската навигација, дадена во понеделникот, „остварен е контакт со производителот и дозволен е онлајн пристап до уредот за да се направи дијагностика од производителот и да дадат предлози и поддршка за решавање на проблемот“.

Агенцијата за цивилно воздухопловство има регулаторни функции поврзани со безбедноста во сите области во воздухопловството и затоа „Слободен печат“ ги праша: Дали М-НАВ ја прекршила регулативата во однос на навремено обезбедување на радар за контрола на слетувањата на авионите? Директен одговор не добивме.

– Агенцијата за цивилно воздухопловство и М-НАВ согласно своите надлежности преку претходно спроведени анализи на ризици и безбедносни проценки навремено развиваат процедури и протоколи што јасно ги прецизираат постапките на делување на сите учесници во воздушниот сообраќај кога ќе се појави ваков случај. Во овој случај М-НАВ постапува по процедури што се претходно развиени и утврдени и чија единствена намена се токму вакви ситуации. Агенцијата за цивилно воздухопловство ја следи состојбата и е во постојана координација со М-НАВ и досега нема констатирано загрозување на безбедноста на летањето предизвикано од овој дефект – изјавија од Агенцијата.