Африканската унија го суспендираше Нигер од сите активности по воениот удар и им порача на своите членки да избегнуваат каква било акција што може да ја легитимира хунтата.

Минатомесечниот пуч предизвика тревога кај западните сојузници и демократските африкански држави, кои стравуваат дека тоа би можело да им дозволи на милитантните групи во регионот Сахел да го прошират својот дофат и да ѝ дадат на Русија основа да го зголеми своето влијание, пишува РСЕ.

Економската заедница на западноафриканските држави (ЕКОВАС) се обидува да преговара со хунтата, но вели дека е подготвена да испрати војници во Нигер за да го врати уставниот поредок доколку дипломатските напори не успеат.

Советот за мир и безбедност на Африканската Унија денеска соопшти дека ја констатираше одлуката за активирање на подготвителните сили на ЕКОВАС и побара од Комисијата на АУ да ги процени економските, социјалните и безбедносните импликации од распоредувањето на таквите сили.

Тие ги повторија своите повици до водачите на пучот веднаш да го ослободат новоизбраниот претседател Мохамед Базум, кој е во притвор по пучот, и да се вратат во нивните касарни.

Водачите на државниот удар досега се спротивставуваа на притисокот да се повлечат и предложија тригодишен рок за одржување избори, план кој ЕКОВАС вчера целосно го отфрли.

Африканската Унија, исто така, соопшти дека силно отфрла какво било надворешно мешање од кој било актер или земја надвор од Африка, вклучително и вмешаност на приватни воени компании, за кои се верува дека се однесува на руската платеничка група Вагнер, која е активна во соседно Мали.