Македонското друштво „Илинден“- Тирана, ја поздрави одлуката на судот во албанскиот пограничен град Пешкопеја, кој денеска им изрекол притвор на трите лица вмешани во издавањето лажни потврди за „бугарско потекло“, во административната единица Острени, во областа Голо Брдо.

– Очекуваме истрагата да се прошири и во други области и населени места каде што оваа појава, повеќе од сигурни сме дека трае неколку години. Со интензивирањето на издавањето лажни потврди, кои ги добиваат албански граѓани од сите етнички заедници, но и другите проблеми кои го следеа пописот, повеќе од сигурни сме дека резултатите нема да ја дадат објективна слика за етничката припадност на популацијата во земјата – оценуваат од друштвото.

Судот на администраторот на единицата, Љуан Мјештри (62) и на Арлин Лимани (33), раководител на секторот за социјални работи и двајцата од Острени, им изрече мерка затвроски притвор, како и домашен притвор за Фитим Бала (61), од селото Требиште, секретар на Советот на општина Булќиза. Тројцата во соработка издавале потврди за бугарска националност на албански граѓани, за да може да аплицираат за бугарски пасоши и државјанство и тоа го наплатувале до 1.000 евра.

Новинари на „Фикс Фаре“ за 100.000 леки купиле две потврди потпишани од администраторот на Острени, Луан Мјештри, кој инаку е брат на градоначалничката на Булќиза, Фестиме Мјештри.

Друштво „Илинден“ и единствената македонска партија во Албанија, Македонска алијанса за европска интеграција, МАЕИ, ги поздравија откривањето на скандалот и експресната интервенција на полицијата, оценувајќи дека „тоа е уште една потврда дека пописот на населението поминал со многу проблеми“.

Претседателот на МАЕИ, Васил Стерјовски, за МИА, вчера изјави дека бараат „проширување на полициската акција и во други општини и региони во Албанија, каде што се одвиваат слични незаконски активности“.