Зверев: Старата гарда наскоро ќе падне
Младиот германски тенисер смета дека постарите играчи имаат поголема корист од пандемијата на коронавирусот и најавува промени во врвот на тенисот.
Тениската сезона поради пандемијата на коронавирусот е суспендирана се до 13 јули, но за очекување е таа да потрае подолго.
Седмиот тенисер на замрзнатата АТП ранг листа, Александер Зверев, смета дека паузата во тенисот повеќе им одговара на Новак Ѓоковиќ, Рафаел Надал и Рожер Федерер, отколку на помладите тенисери.
– Тие имаат своја рутина и точно знаат што прават. Покрај тоа, тие делуваат далеку посвежо по секоја пауза. Верувам дека прекинот на тениската сезона добро ќе им дојде. Но, сигурен сум дека старата гарда наскоро ќе падне – изјави Зверев.
Германецот се надева дека годинава ќе се игра барем некој грен слем турнир, откако Вимблдон е откажан, додека Ролан Гарос е преместен за септември, а сè уште не се знае судбината на УС Опен.
– Би било добро да одиграме уште два грен слем турнири годинава. Нормално дека сакаме да играме без публика, но доколку тоа не е возможно, ќе има преноси на ТВ. Подобро нешто отколку ништо – вели Зверев.
