Германскиот тенисер Александер Зверев се пласираше во третото коло на „Ролан Гарос“ откако го совлада Русинот Роман Сафјулин со 7:6 (4), 6:3 и 7:6 (1).

Мечот траеше два и пол часа, Зверев кој важи за еден од фаворитите на турнирот доста се намачи против 182 играч на светот.

Германецот во третото коло ќе игра против Ласло Џере кој во српскиот дуел го елиминираше Миомир Кецмановиќ со 3:2 во сетови 4:6, 4:6, 6:3, 6:2 и 6:3 за три и пол часа игра.

Во уште еден долг меч Аргентинецот Делбонис го совлада Андухар-Алба од Шпанија со 3:2, а Норвежанецот Руид немаше никакви проблеми со Камил Мајхржак (6:3, 6:2 и 6:4).

Во женска конкуренција имаше неколку изненадувања, Дарија Касаткина од Русија ја совлада 10 носителка Белинда Бенчиќ од Швајцарија со 2:0 (6:2, 6:2), а Катерина Синиакова од Чешка ја победи 29 носителка од Русија Вероника Кудерметова со 7:6 (7), 5:7 и 7:5).

Триумфи забележаа уште Тамара Зиданшек (Словенија) против Американката Медисон Бренгл (6:4, 6:1), Сорана-Михаела Кирстеа (Романија) против Италијанката Мартина Тревизан (6:4, 3:6, 6:4), а Маркета Вондрушова од Чешка ја елиминираше Хармони Тан од Франција со 6:1 и 6:3 за еден час и три минути игра.